شعر : دیلداریمه دونیا بؤیی شیوا سخنیم وار...
چهارشنبه, ۱۷ آبان ۱۳۹۶، ۱۰:۱۸ ق.ظ
دلداریمه دؤنیا بؤیی شیوا سخنیم وار
زؤلفونده ، غزل سیرینه ، مخمل چمنیم وار
فرهاد اگر تیشه سی داغلاردا یایردی ،
داغلارجا قلم تیشه سی یایماخدا ، منیم وار
اؤلدوزلار اگر یاغسا منیم باشیمه بیرگون ،
دیرمان داشینین آلتینا رویین بدنیم وار
قان ایچره یاتان لاله لرین عشقینه آلقیش!
بو عرصه ده، آزاده ، ماراخلی وطنیم وار
گؤزیاشی منه بسدی گئجه ناله لریمله
دیوارین اؤتاییندا فقط بیر کفنیم وار
تاری منه بسدی بوجهاندا ، نه غمیم وار
بؤلبول کیمی سنبل لر ایچینده سمینم وار
آخشام چاغی ، سؤ ، کوچه یه سَپدیم ، بو گؤزومله
گؤز یاشی یازار غمله : منیم ده گلنیم وار
سؤلموشدی عؤمورغنچه سی ، ساومیشدی قیزیل گؤل
عمرون خزانی ، گؤر نه قدر گؤل دَره نیم وار
سراینده ی شعر: کبری شریف زادگان
